Книга "Догалар энциклопедиясе", изд. Раннур

Бисмил-ләһир-рахмәнир-рахим.
Әлхәмдү лил-ләһил-ләзи нәззәлә минәл-Курьәни мә һүә шифә'ү үә рахмәтүл-лиль-мүьминин.

Иман әһеленә Коръәннән шифасын һәм рәхмәтен иңдерүче Аллаһы Тәгалә Раббыбызга барча хәмед-сәналәребез булса иде! Үәс-саләтү үәс-сәлáмү гъалә сәййидинә Мухәммәдинил-әмин табиб кулүбил-мүьминин үә гъалә өлиһи үә сахьбиһи әҗмәгъыйн.
Иман әһеле күңелләренең табибы булучы Рәсүл Әкрам Мөхәммәдәл Мостафа хәзрәтләренә һәм аның барча әһле бәйте вә сәхабәләренә салават-сәламнәр булса иде!

Динмөбиндә газиз кардәшләрем! Мөхтәрәм хәзрәтләр, мөхтәрәмә абыстайлар! Раббуль-Гыйззә хәзрәтләренә тәвәккәлләп, сезнең олы игътибарыгызга яңа бер китабыбызны тәкъдим итәбез. Шаять иншаллаһ, букитаптан файдалы мәгълүматлар ала алырсыз. Китабыбызның исеме «Догалар энциклопедиясе», ягъни «Догалар мәҗмугасы». Мәгълүм булганча, Раббыбыз Тәбарәкә вә Тәгалә хәзрәтләре атабыз Адәмне (галәйһис-сәлам) яратканда, аның булачак җәсәде өстенә яңгырлар яудырды. Бу яңгырларның бары тик уннан бер өлеше генә рәхмәт яңгыры, калганнары исә гамь, эч пошу, хәсрәт яңгырлары була. Шуңа күрә, пәйгамбәребез Мөхәммәд әл-Мостафа (салләллáһүгаләйһи вә сәллáм) әйткәнчә, мөэмин бәндәнең тәненә кергән шырпы да аның гөнаһларыннан, хата кимчелекләреннән кәффарәт булыр, ди. Адәм баласы авырый, чирли, борчыла, аның эче поша, ул хәсрәткә чума…

Боларның барысы да кешегә уңайсызлык тудыра. Шуңа күрә Рәсүлебез Хәбибуллаһи Мөхәммәд: «И Аллаһы Тәгаләнең бәндәләре! Дәваланыгызчы! Хакыйкать ки, Аллаһы Тәгалә авыруны бар итеп, аннан шифасын да булдырган!» - дигән. Икенче бер хәдисендә исә Ул: «Хакыйкать ки, Аллаһы Тәгалә, дәвасын булдырмыйча, авыруын да булдырмас», - дигән. һәм шунда ук Ул: «Авыруларның бертөрлесеннән шифа табып булмас», - дип кисәткән. Аннан ул авыру, ягъни дәвасы булмаган, шифасын табып булмаган авыру турында сорыйлар: «Йә Рәсүлуллаһ! Нинди авырусоң ул?» Пәйгамбәр (галәйһис-сәлам): «Картаю», - дип ачыклый… Димәк, һәртөрле авырудан, чирдән, хастадан дәвалау ысуллары, даруы, шифалану юллары булыр. Бары тик табигый картаюдан гына дару юктыр…